انٹرنیٹ براؤزر ”انٹرنیٹ ایکسپلورر“ ہلاس کنگ بوت
 |
| فوٹو بشکریہ : مائیکروسافٹ |
انٹرنیٹ ءِ پجار جوڑ بوؤکیں براؤزر ”انٹرنیٹ ایکسپلورر“ دائمی ہلاس کنگ بوت۔اے انٹرنیٹ براؤزر دنیا ءِ نامداریں ٹیکنالوجی کمپنی ”مائیکروسافٹ“ءَ جوڑ کرتگ ات۔
مائیکروسافٹءَ چار سال پیش 2016ءَ ”انٹر نیٹ ایکسپلورر“ کارمرز کنوکاناں صلاح داتگ کہ ایشیءِ کارمرز کنگ ءَ یلہ بکن ئے پرچا کہ کمپنی ایشیءَ بند کنت۔
مائیکروسافٹ ءَ 2016ءَ”انٹر نیٹ ایکسپلورر“ ءِ کہنیں ورژن کمک ہلاس کرتگ۔بلئے ویب براؤزر ءِ نوکیں 2013ءِ تہا پیش کرتگیں یازدہمی ورژنءَ را کمک دئیگ ءَ بوتگ۔
مائیکروسافٹ ءَ گوستگیں بازیں سالاں ”انٹرنیٹ ایکسپلورر“ءِ کارمرزکنوکاناں ”انٹر نیٹ ایکسپلورر“ ءِ ھرابیانی بابتءَ خبردار کرتگ ء ُ وتی نوکیں براؤزر”مائیکرو سافٹ ایج“ ءِ کارمرز کنگءِ سکین داتگ۔پرچا کہ اے نوکیں براؤزرگوگل کروم ءِ وڑا جوڑ کنگ بوتگ۔
نوکیں براؤزر”مائیکروسافٹ ایج“ ءِ پیش کنگءَ پد نوں کمپنی ءَ ”انٹر نیٹایکسپلورر“ دائمی ہلاس کنگ ءِ جار جتگ۔
مائیکروسافٹ ءَ وتی ”بلاگ“ ءِ تہا تچکءَ گشتگ کہ ”انٹر نیٹ ایکسپلورر“را17اگست2020ءَ ہلاس کنگ بوتگ۔بلئے کمپنی ءِ گشگ اِنت کہ ہمے داں سال ءِ 30نومبرءَ ”انٹر نیٹ ایکسپلورر“ کارمرز کنوکاناں اپڈیٹ دئیگ بیت۔
مائیکروسافٹ ءِ ٹیم ءَ انٹر نیٹ کارمرز کنوکاناں صلاح داتگ کہ آ جوانیں انٹرنیٹ کارمرز کنگ ءِ واستہ کمپنی ءِ نوکیں براؤزر”مائیکروسافٹ ایج“ءَ کارمرز بکن اَنت۔
 |
| فوٹو بشکریہ : مائیکروسافٹ |
زانگ بہ بیت کہ مائیکروسافٹ کمپنی ءَ اولی رندءَ 25سال پیسر1995ءَ ”انٹر نیٹ ایکسپلورر“براؤزر جوڑ کرتگ ء ُ پیش کرتگ۔ء ُ آ وہد ءَ اے دنیا ءِ یکیں براؤزر اَت۔
”انٹر نیٹ ایکسپلورر“بازیں داں سالاں انٹرنیٹ ءِ پجار جوڑ بوتگ بلے 2004ءَ موزیلا فاؤنڈیشن ءَ ”فائر فوکس“ ءِ نام ءَ یک براؤزرے جوڑ کرتگء ُ دنیا ءِ دیما پیش کرتگ۔
فائر فوکس ءَ چہ رند گوگل ءَ 2008ءَ ”گوگل کروم“ ءِ نام ءَ یک براؤزر ے جوڑ کرتگ ء ُ پیش کرتگ،کہ اے نوں ایندگہ درستیں براؤزراں چہ دیما اِنت۔
فائر فوکس ء ُ گوگل کروم براؤزرءِ آہگ ءَ چہ رند مردم ”انٹر نیٹ ایکسپلورر“ ءَ چہ پہک بیھال بوتگاں بلے مائیکروسافٹ ءَ ”مائیکرو سافٹ ایج“ ءِ نام ءَ نوکیں براؤزرے جوڑ کرتگ ء ُ وتی کہنیں بستارءِ حاصل کنگءِ جہد کرتگ۔
0 Response to " انٹرنیٹ براؤزر ”انٹرنیٹ ایکسپلورر“ ہلاس کنگ بوت"
Post a Comment