فیس بک ءَ آڈیو سوشل ایپ ءِ سرا کار بندات کرتگ
 |
| فوٹو بشکریہ : Pexels |
نیو یارک ٹائمز ءَ وتی یک رپورٹے ءِ تہا گشتگ کہ فیس بکءَ آڈیو ایپ”کلب ہاؤس“ءِ وڑیں یک آڈیوسوشل ایپ ے ءِ سرا کار بندات کرتگ۔
”کلب ہاؤس“ پرے زوتاں ”آئی ایس او“ ڈیوائسءِ کارمرزکنوکانی واستہ دیما آرگ بوتگ۔ ء ُ انوں باز مشہوراِنت۔
نیو یارک ٹائمز ءِ رپورٹ ءِ رِدءَ فیس بک ءِ نوکیں پراڈکٹ ءِ سرا تنی ءَ بنداتی کار بنگیج بوتگ۔ ء ُ اے انگتءَ زانگ نہ بیت کہ کدی ساڑی بیت ء ُ نہادی ءَ آرگ بیت۔
اے رپورٹ ہما وہدءَ دیما اتکگ وہدے فیس بک ءِ سروک مارک زگربرگ ”کلب ہاؤس“ءِ تہا ہوار بوتگ ء ُ آئی ءِ یک رومےءِ تہا اگیومینٹڈء ُ ورچوئل رئیلٹی ءِ باندات ءِ سرا گپ ء ُ تران اِش کرتگ۔
”ہاؤس کلب“ ءِ تہا مارک زکر برگ ءِ پیمیں مردمے ءِ ہوار بوہگ یک حیرانی گپے اَت۔بلے فیس بک ءِ نیمگءَ چہ ہمے رنگیں ایپ ے ءِ جوڑ کنگ حیرانی گپے نہ اِنت۔پرچا کہ فیس بک ءِ بابتءَ اے گپ مشہوراِنت کہ آ ہر وڑیں نوکیں ھیالے،پراڈکٹ ء ُ ایپ ے کہ دیما کئیت آئی ءَ نقل کنت۔
فیس بک ء ُ آئی ءِ ملکیت ایں ایپ انسٹاگرام ءِ تہا بازیں انچیں فیچر است انت کہ ایندگہ ایپلی کیشناں چہ دُزگ بوتگاں چوش کہ اسنیپ چیٹءِ اسٹوریزء ُ ٹک ٹاکءِ وڑیں کسانی ویڈیوہاناں انسٹاگرام ءِ بہر جوڑ کنگ۔ء ُ اے درست نقل کنگ بوتگاں ء ُ فیس بک اے کارءَ زبر اِنت۔
ٹوئٹر ءِ نیمگءَ چہ پیسرءَ ”کلب ہاؤس“ ءِ وڑیں یک ایپ اسپیسزے ءِ سرا کار کنگ بوہگءَ اِنت کہ اے وہدءَ بیٹا ورژن ءِ تہا اِنت۔
ٹوئٹرءَ ایشیءِ واستہ ”بریکر“ نامیں یک سوشل پوڈ کاسٹنگ کمپنی یے ءِ ام بہا زرتگ تاکیں آئی ءِ سوشل آڈیوکوالٹی ءَ چہ نپ زورگ بہ بیت۔
دومی نیمگءَ مارک کیوبن ءِ نیمگءَ چہ ام یک لائیوآڈیوایپ ”فائر سائیڈ“ءِ سرا کار بوہگءَ اِنت۔
چوناہا انوں ٹیکنالوجی دنیا ءِ تہا آڈیوءِ ٹیکنالوجی ءِ سرا گیش ءَ چہ گیش کار کنگءِ نیت داراَنت پرچا کہ آہمے سما کنگءَ اَنت کہ آڈیو بانداتءَ مہلوک ءِ میان ءَ رسانک ءِ یک جوان تریں درے بوت کنت۔
انوں ام بازیں پوڈ کاسٹ ایپ است کہ مہلوک وتی ہر روچی ایں زند ءِ حالاں، شعر، کسہ ء ُ ایندگہ چیزاں ریکارڈ کنگءَ اَنت ء ُ ایر کنگءَ انت۔ ء ُ ہمے وڑا مزن مزنیں گدار ء ُ ایندگہ کتاب آڈیو ءِ تہا آرگ بوہگءَ اَنت۔
0 Response to " فیس بک ءَ آڈیو سوشل ایپ ءِ سرا کار بندات کرتگ"
Post a Comment