ابید فون ءِ دست جنئگءَ واٹس ءَ آڈیو میسج دیم بدئے اِت

 

فوٹو بشکریہ گوگل 

باز براں مئے نزکیں مردم مارا میسج دیم دیاں ء ُ ماہم لوٹیں کہ میسجاں پسہ بکنیں بلے کدی کدی مردم ءَ را میسج نبشتہ کنگ واک نہکنت ۔

نوں گوگل کمپنی ءِ ایپلی کیشن ”گوگل اسسٹنٹ“ ءِ کمکءَ چہ ما ابید چہ فون ءِ دست جنئگءَ آڈیو میسج دیم دات کنیں۔

 گوگل کمپنی ءَ وتی یک بلاگ پوسٹءِ تہا اے جار جتگ کہ آئی ءِ نیمگءَ چہ شمئے موبائل فونانی کانٹیکٹس لسٹ ءِ تہا ہواریں مردماناں وائس میسج دیم دئیگ ءِ کار جوان تر کنگ بوتگ۔

کمپنی ءِ گشگ ءِ رِدءَ  اے آسراتی (فیچر) ءِ کارمرز کنگ ءِ واستہ بس اے گشگی اِنت کہ”گوگل سینڈ آڈیو میسج“

Hey Google, send audio message

اے گشگءَ چہ رند شمئے دیما ایس ایم ایس (اگاں شمئے فون ءِ تہا گوگل اسسٹنٹ ایکٹیو اِنت ء ُ  آئی ءِ آڈیو میسج دیم دئیگ ءِ آسراتی آپشن چالو اِنت)ء ُ واٹس ایپ ءِ دو آپشن گندگءَ کئیت۔

 

اے دوئیں آپشنانی تہا یکے ءِ گچین کنگءَ،بزاں کہ واٹس ایپ ءِ گچین کنگءَ چہ”گوگل اسسٹنٹ“ ءِ نیمگءَ چہ گشگ بیت کہ وائس میسج ریکاڑد بکن۔ ء ُ اے تیوگیں کار فون ءِ دست جنئگءَ ابید تہنا آواز ءِ کمکءَ چہ بنت۔

اگاں شما وتی فون ءِ تہا گوگل اسسٹنٹءِ وائس کمانڈ ”ان ایبل“نہ کرتگ گڈا شما تچکءَ گوگل اسسٹنٹ ءَ پچ کرت کن اِت ء ُ وتی واٹس ایپ سنگتے ءَ را آڈیو میسج دیم دات کن اِت۔

گوگل ءِ گشگ اِنت کہ اے  فیچر انگلش ہبر کنوکیں مردمانی واستہ اِنت بلے گوگل اسسٹنٹ ءَ ایکٹیو کنگء ُ پدا انگلش ءَ کمانڈ دئیگ ءَ پدتو وتی کلوہ ءَ ہر زبان ءَ دیم دات کن اِت۔     

اے فیچر ءِ کارمرزکنگ ءِ واستہ واٹس ایپ پچ کنگ ء ُ کانٹیکٹس ءِ شوہازکنگ ء ُ وائس میسج دیم دئیگءِ تکلیفءَ چہ جان چٹیت۔ 

چوناہا”گوگل اسسٹنٹ“ ویب سائٹانی تہے نبشتہاں ہم گوں مزنیں توارءَ وت وانیت ء ُ شما را گوش دارینیت۔کہ ایشیءِ واستہ بس آئی ءَ را اے کمانڈدئیگی اِنت”ہے گوگل،ریڈ اٹ،  یا  ”ہے گوگل،ریڈ دس پیج“

گوگل اسسٹنٹ یک باز کارامدیں ایپلی کیشنے۔ ایشیءَ چہ شما سیلفی ہم کش اِت کن اِت۔ بس گوگل اسسٹنٹءَ را اے کمانڈ دئیگی اِنت کہ ”ہے گوگل، ٹیک  اے سیلفی“ ۔  شمئے وائس  کمانڈءَ  چہ رند گوگل اسسٹنٹ وت شمئے موبائل فون ءِ دیم ءِ کیمرہ ءَ پچ کنت ء ُ 3براھساب ءَ چہ رند عکس ءَ کشیت۔