ٹوئٹرءِ تہا ٹویٹانی شیڈول ء ُ ڈرافٹ کنگءِ آسراتی آرگ بوت

 Pexels فوٹو بشکریہ

چاگردی رابطہ کاری ءِ نامی ئیں ویب سائٹٹوئٹر ءَ   ٹویٹانی شیڈول ء ُ ڈرافٹ کنگءِ فیچر  پیش کرتگ۔کہ چریشیءَ چہ نوں ہرکس وتی ٹویٹاں شیڈول کرت کنت۔بزاں وتی ٹویٹاں وتی دل ءِ تبءَ وتہ داتگیں وہد ء ُ پاس، یا ہماروچءَ کہ آ لوٹیت شنگ اش کرت کنت۔ یا آ وتی ٹویٹاں ڈرافٹ ہم کرت کنت بزاں نبشتہ کنت ء  ُ  دنیا ءِ نگاہاں چہ اندیم ایر کرت کنت۔ ء ُ رندا شنگ اش کرت کنت یا کارمرزاش کرت کنت۔

  

ٹوئٹر ءِ تہا چریشیءَ پیسر ٹویٹانی شیڈول ء ُ ڈرافٹ کنگ ءِ آسراتی نبوتگ۔ بلے بازیں مردمے ءَ ایندگہ ایپانی کمک ء ُ کارمرزیءَ چہ وتی ٹویٹ شیڈول ء ُ ڈرافٹ کرتگ اَنت۔بلے نوں ٹوئٹرءَ اے آسراتی وت آؤرتگ۔

ٹوئٹر ءَ اے آسراتی گوستگیں سال ءَ پیش کرتگ بلے چندے مردم ءَ اے آسراتی دئیگ بوتگ۔ بلے نوں ایشیءَ راتیوگیں جہان ءِ واستہ پیش کنگ بوتگ۔

اے آسراتی ٹوئٹرءِ ہما کارمرزکنوکانی واستہ مزنیں کمکے کہ سک باز ٹویٹ کن اَنت۔ 

اے آسراتی ءِ کارمرزکنگ ءِ واستہ ٹویٹ نبشتہ کنگ ءِ ونڈوءِ تہاوہدے تو وتی ٹویٹ ءَ نبشتہ کن ئے گڈا جہلءَ گھڑیال ءِ یک آپشنے گندگ بیت۔ ہمے آپشنءَ وہدے کلک کن اِت گڈا دگہ ونڈویے پچ بیت کہ ہمائی ءِ تہا تو وتی ٹویٹ ءِ شنگکاری ءِ روچ، وہد ء ُ پاساں ٹہینت کن اِت۔

ایشیءَ ابید وتی ٹویٹءَ ڈرافٹ ءِ تہا ایر ہم کرت کن اِت کہ کس آئی ءَ دیست نہ کنت۔

ڈرافٹ ءِ تہا ٹویٹانی ایرکنگءِ راہبند اے وڑا ِنت کہ وہدے وتی ٹویٹءَ نبشتہ کن ئے گڈا چپیں نیمگءَ کراس(x)ءِ آپشن گندگ ءَ کئیت ہمیشیءِ کلک کنگءَ چہ ”سیو“ ءِ آپشن درابیت۔ ء ُ  ”سیو“ ءِ آپشنءِ کلک  کنگءَ چہ  ٹویٹ ڈرافٹ ءِ تہا ایر بیت۔

ڈرافٹ ءِ تہے ٹویٹاں دوبر چارگ لوٹ ئے تہ  ٹویٹ نبشتہ کنگ ءِ ونڈو ءِ تہابُرزءَ راستیں نیمگءَ ”ان سینٹ ٹوئٹس“ ءِ یک آپشنے گندگءَ کئیت ہمیشیءِ کلک کنگءَ چہ ڈرافٹ ءِ تہے ایریں ٹویٹ گندگ بنت۔